Benjamin Netanyahu kann missa stjórnarvaldið í Ísrael. Hóast andstøðan stendur til at fáa fleiri tinglimir enn stjórnarflokkarnir, hevur hvørgin av teimum báðum politisku blokkunum tryggjað sær meiriluta.

Sambært einari fyribils veljarakanning hjá ísraelska miðlinum KAN stendur andstøðan undir leiðslu av Gadi Eisenkot til at fáa 53 tinglimir, meðan Netanyahu og stuðulsflokkar hansara standa til at fáa 50.

Fyri at fáa meiriluta í ísraelska tjóðartinginum, Knesset, krevjast 61 av teimum 120 sessunum.

Arabisku flokkarnir kunnu avgera valdið

Teir arabisku flokkarnir Ra'am og Sameindi Listin standa til at fáa 17–18 tinglimir tilsamans.

Mansour Abbas, leiðari í Ra'am, sigur sambært Haaretz, at hann vónar at kunna tryggja meiriluta saman við andstøðuni.

Yousef Jabareen, leiðari í Sameinda Listanum, sigur, at flokkurin nú er so sterkur, at ikki longur ber til at síggja burtur frá honum.

Sameindi Listin stendur til at økja úr fimm upp í 11 tinglimir.

Metstór valluttøka og óviss framtíð

Valluttøkan var 77,7 prosent. Tað er hægsta valluttøka í Ísrael síðani 1999 og 7,1 prosentstig meira enn á valinum í 2022.

Likud hjá Netanyahu stendur til at fáa 25 tinglimir, meðan Yashar hjá Eisenkot stendur til at fáa 21.

Eisenkot hevur boðað frá, at hann vil arbeiða fyri at skifta stjórnina hjá Netanyahu út og skipa eina nýggja savningarstjórn.

Men enn er ógreitt, hvør fer at stjórna Ísrael. Atkvøðurnar eru ikki liðugt taldar, og samráðingar kunnu gerast avgerandi fyri, hvør fær meiriluta.