Stórar nøgdir av vatni fossaðu í gjár inn í fráferðarhøllina í Kastrup Lufthavn, tá vatn streymdi niður úr loftinum í einum parti av farstøðini.

Upptøkur frá staðnum vísa, hvussu vatnið fossar niður sum ein lítil fossur, meðan ferðafólk og starvsfólk royna at sleppa fram.

Orsøkin til vatnlekan er staðfest. Sambært samskiftisstjóranum í Kastrup Lufthavn, Lise Agerley Kürstein, stavaðu stóru vatnmongdurnar frá, at rent var á eitt sprinklerør í sambandi við byggiarbeiði í nýggju farstøðini hjá lufthavnini.

Starvsfólk komu skjótt á staðið at sperra økið av og fóru undir uppturking og upprudding. Samstundis var arbeitt við at steðga vatnlekanum og avmarka skaðarnar.