Vísindafólk stúra eftir, at tveir náttúrueldar kyknaðu í Grønlandi innan eina viku, fyrr í hesum mánaðinum. Eldarnir vóru nær Sisimiut 14. og 15. juni og í Kujalleq sunnast í Grønlandi tann 17. juni.

Hóast eldarnir vóru smáir, siga granskarar, at tað er óvanligt, at slíkir eldar kykna longu mitt í juni. Hetta bendir á, at gróður og jørð vóru óvanliga turr orsakað av lítlari kavamongd, lítlum avfalli og hægri hita enn vanligt.

Stór øki fram við grønlendsku strondini eru ísfrí og kunnu gerast eldfim í turrum tíðarskeiðum. Serliga torvueldar vekja stúran, tí teir kunnu loysa stórar nøgdir av kolevni út í andrúmsloftið.

Sambært vísindafólkum er hetta enn eitt tekin um broytingarnar í Arktis, har hitin hækkar nógv skjótari enn heimsmiðal. Tey leggja tó dent á, at eingin einstakur eldur kann beinleiðis knýtast at veðurlagsbroytingum, men at tær umstøður, sum gera eldar meira sannlíkar, gerast alsamt vanligari.