Vísindavøkan verður í ár hildin fyri 19. ferð. Endamálið er at byggja brýr millum føroyskar granskarar og almenningin og at økja áhugan fyri gransking og granskingarúrslitum.
Byrjað verður við Løkin
Fyrsta ferðatiltakið verður á Bókasavninum við Løkin mánakvøldið 14. september klokkan 19.
Síðani verður farið til Klaksvíkar Bókasavn 15. september, Sørvágs Bókasavn 16. september og Sands Bókasavn 17. september. Øll tiltøkini verða frá klokkan 19 til 21.
Seinasta ferðatiltakið verður í Miðlatúni í Vági mikukvøldið 23. september.
Høvuðstiltakið verður í Havn
Fríggjadagin 25. september klokkan 8.30 verður sjálv Vísindavøkan hildin í Sjóvinnuhúsinum í Havn.
Vísindavøkan er sprottin úr evropeiska átakinum European Researchers’ Night, sum verður fyriskipað í býum kring alt Evropa. Her fáa bæði børn og vaksin høvi at hitta granskarar og hoyra um arbeiðið hjá teimum og týdningin, sum granskingin hevur fyri føroyska samfelagið.
