Bárður á Steig Nielsen, landsstýrismaður, hevur sett 4.000 tons av føroysku svartkjaftakvotuni í 2026 av til vinnuligar fiskiroyndir. Nú ber til at søkja um part av kvotuni.

Menning og nýskapan verða raðfest

Kvotan kann fiskast bæði í føroyskum sjógvi og í altjóða sjógvi í NEAFC-skipanarøkinum. Tá umsóknirnar verða viðgjørdar, verður serligur dentur lagdur á menningar- og nýskapanarvirðið í royndunum.

Umsóknin skal millum annað lýsa endamálið við royndunum, tíðar- og kostnaðarætlan, fiskifar, reiðskap, útgerð og leiðir. Eisini skal greiðast frá, hvussu fiskurin verður goymdur umborð, fingin til høldar og virkaður á landi.

Freistin er 25. september

Umsóknir skulu vera Uttanríkis- og fiskimálaráðnum í hendi í seinasta lagi á middegi fríggjadagin 25. september 2026.