Løgtingsmaðurin Magni Højgaard hevur sett Bárði á Lakjuni, landsstýrismanni í mentamálum, ein skrivligan fyrispurning um møguligar avmarkingar á sosialum miðlum.
Hann spyr millum annað hvussu langt arbeiðið við einum møguligum aldursmarki er komið, hvørjir sosialir miðlar kunnu verða fevndir av eini slíkari skipan, og um arbeitt verður við eini talgildari loysn, sum kann vátta aldurin á brúkarum.
Spyr um talgilda aldursváttan
Í fyrispurninginum verður víst á møguleikan fyri eini app, sum kann vátta aldurin á tí, ið roynir at rita inn á sosialar miðlar.
Magni Højgaard vísir á, at líknandi ætlanir hava verið umrøddar í Danmark. Hann nevnir eisini, at Føroyar longu hava talgildar skipanir sum Vangan og Samleikan, og spyr, um ein slík loysn eisini kann nýtast í Føroyum.
Stúrir fyri ávirkanini á børn
Í viðmerkingunum til fyrispurningin verður víst á fleiri avbjóðingar, sum verða settar í samband við børn og sosialar miðlar.
Magni Højgaard nevnir millum annað kriminalitet á netinum, bundinskap, ávirkan á atburð og svøvn hjá børnum og ungum. Hann vísir eisini til kjakið um PISA-kanningina, har sosialir miðlar, skermar og alnetið hava verið nevnd sum órógvandi tættir, ið kunnu hava við sær, at børn og ung lesa ov lítið.
Samstundis verður dentur lagdur á, at stórir miðlar sum Snapchat og TikTok eisini mugu taka ábyrgd og vera partur av eini møguligari loysn.
