Á venjingini - nevnd Aurora 26 - á svensku oynni Gotlandi høvdu ukrainskir hermenn leiklutin sum álopslið. Sambært tíðindastovuni AP noyddist venjingin at steðga tríggjar ferðir, tí svensku deildirnar vórðu ov lætt raktar. Í einum veruligum bardaga høvdu tær verið oyðilagdar.

Ukraina lærir NATO at yvirliva

Ukrainsku dronu-pilotarnir greiddu aftaná venjingina frá, at svensku herdeildirnar hava møguleikar, tó at bæði dronutøkni, taktikkur og fatanin av dronukrígging mugu betrast munandi. 

Ukrainar vístu á, at royndirnar frá vígvøllinum í Ukraina geva eina vitan, sum vesturlendskar herdeildir framvegis tørva.

Svenski verjuleiðarin Michael Claesson tók undir við hesum og segði, at NATO-herdeildir  mugu læra nógv meira um dronukríggj, og at skjótasti vegurin til hendan lærdóm er at lurta eftir ukrainum.

Gotland í miðdeplinum

Venjingin fór fram á Gotlandi, sum liggur strategiskt mitt í Eystrasalti millum Svøríki og russiska Kaliningrad. Claesson segði, at tann, sum hevur tamarhald á Gotlandi, í stóran mun hevur tamarhald á miðpartinum av Eystrasalti.