Nýggja fosturtøkulógin er nú komin í gildi í Føroyum.

Lógin kom í gildi 1. juli 2026 og avloysir gomlu fosturtøkulógina frá 1956. Tað segði Eyðdis Hartmann Niclasen, landsstýriskvinna í heilsu- og orkumálum, í røðu í Mettustovu mikudagin.

Samkoman varð skipað av Kvinnufelagnum í Havn, Frítt Val, Amnesty Føroyar og Abort.fo.

Gomul lóggáva løgd aftur um

Í røðuni legði landsstýriskvinnan dent á, at nýggja lógin er eitt týðandi stig fyri sjálvræði, ábyrgd og virðing.

Hon vísti á, at Føroyar eru nógv broyttar síðani 1956, men at fosturtøkulógin kortini stóð eftir. Nú verður gamla lóggávan avloyst.

Eyðdis Hartmann Niclasen takkaði eisini felagsskapunum og teimum mongu, sum í nógv ár hava borið málið fram og hildið lív í kjakinum.

Ein atkvøða gjørdi munin

Málið hevur verið politiskt torført og kensluborið.

Landsstýriskvinnan vísti á, at lógin varð samtykt við 17 atkvøðum fyri og 16 ímóti. Tað var sostatt bert ein atkvøða, sum gjørdi munin.

Sambært landsstýriskvinnuni vísir tað, at stór samfelagslig framstig ofta hvíla á smølum meirilutum.

Lóg um sterilisatión er nútíðargjørd

Í røðuni varð eisini nevnt, at lógin um sterilisatión er nútíðargjørd. Hon byggir sambært landsstýriskvinnuni á sama grundsjónarmið: at vaksin menniskju sjálv skulu kunna taka avgerð um egnan kropp og egna framtíð.

Hon segði, at nýggja fosturtøkulógin ikki snýr seg um lættar avgerðir, men um rættin at taka truplar avgerðir sjálv.