Føroyar, Grønland og Danmark skulu styrkja vitanina um nýggja trygdarveruleikan í Norðuratlantshavi og Arktis.

Í august 2026 verður eftir ætlan latið upp fyri umsóknum til FASDiNA-skránna. Ætlanin er at fíggja tvær størri granskingarverkætlanir við upp til 3 milliónum krónum til hvørja. Harumframt verður fígging latin til greiningarrit og styttri granskingarverkætlanir.

Tørvurin verður lýstur sum átrokandi. Orsøkin er, at stóru broytingarnar í altjóða geopolitisku støðuni ávirka Norðuratlantshav og Arktis beinleiðis.

Sambært undanlýsingini er trýstið á Føroyar og Grønland vaksið. Stórveldi royna at ávirka londini við handilsligum og politiskum gerðum.

Fokus á trygd og undirstøðukervi

Endamálið er at skapa nýggja vitan um uttanríkisviðurskifti, trygd og verjupolitikk. Samstundis skal skráin menna samstarvið millum Føroyar, Grønland og Danmark á hesum øki.

Umsóknir kunnu fevna um millum annað handil, sivil og hernaðarliga trygd, talgilt og fysiskt undirstøðukervi, veitingartrygd, lágspenningspolitikk, ósamsvarandi áhugamál og tjóðarbygging.