KVF, ÍSF og Betri Oyggjaleikir skipa nú fyri eini kapping um, hvør ið skal skriva tann almenna sangin til oyggjaleikirnar í Føroyum næsta ár.
Hetta verður sangurin, sum skal seta ljóð á oyggjaleikirnar, og vinningarnir eru góðir.
Tríggjar virðislønir verða latnar:
1. virðisløn: 40.000 krónur
2. virðisløn: 20.000 krónur
3. virðisløn: 10.000 krónur
Freistin at senda sang inn er 1. desember 2026. Vinnarasangurin verður frumframførdur á Ítróttafagnaðinum 6. februar næsta ár.
Treytir fyri luttøku
· Sangurin skal vera eitt nýtt, upprunaligt verk, sum ikki áður hevur verið alment spælt ella útgivið.
· Teksturin skal snúgva seg um oyggjaleikir og ítrótt. Onnur evni kunnu eisini flættast uppí.
· Føroyska málið skal vera berandi í sanginum.
· Tað skulu vera fólk, sum syngja allar røddirnar
· Sangurin skal vera so liðugur sum gjørligt, tá ið hann verður latin inn.
· Tey, sum skriva sangin, skulu eiga øll rættindi til orð, lag og upptøkur.
· Hvør luttakari kann í mesta lagi senda ein sang inn til kappingina.
· Dómsnevndin tilskilar sær rætt til - í samráð við vinnaran – at gera onkrar broytingar, sum tey halda vera neyðugar at gera.
Ein dómsnevnd, ið KVF, Oyggjaleikir og ÍSF seta í felag, velur teir tríggjar sangirnar, sum fáa virðisløn. Í dømingini verður dentur lagdur á lag og tekst, og hvussu sangurin hóskar seg sum oyggjaleikasangur.
Freistin at senda sang inn er 1. desembur.
