Ein føroyskur stjóri má rinda 2.000 krónur í avgjaldi fyri ov seint innlatnan ársroknskap, hóast hann hevði fingið skrivliga váttan frá bókhaldaranum um, at alt var í lagi.
Tað hevur Føroya Kærustovnur staðfest í eini avgerð frá 2. september 2026.
Stjórin hevði kært avgerðina hjá Skráseting Føroya, men fekk ikki viðhald.
Kærustovnurin staðfestir, at ábyrgdin av at lata ársroknskapin inn rættstundis liggur hjá leiðsluni, eisini tá ein bókhaldari hevur fingið uppgávuna.
Bókhaldarin segði, at alt var latið inn
Málið snýr seg um ársroknskapin fyri 2023 hjá einum felagi, sum í avgerðini verður nevnt felag A.
Freistin at lata roknskapin inn var 30. juni 2024, men hann varð ikki latin inn fyrr enn 30. august sama ár.
Stjórin hevði sett ein bókhaldara at taka sær av innlatingini og hevði fingið hesa skrivligu váttan:
– Alt er nú latið inn.
Stjórin helt tí, at hann hevði gjørt tað, sum rímiliga kundi væntast av honum. Hann metti, at seinkingin ikki kundi leggjast honum til last.
Fekk ikki áminningina
Stjórin vísti eisini á, at hann var fluttur úr Føroyum, samstundis sum hús hansara vóru seld.
Tí kom áminningin frá Skráseting Føroya ikki fram til hansara, men varð send aftur til myndugleikan.
Hann helt uppá, at hann sostatt ikki hevði havt veruligan møguleika at fáa viðurskiftini í rættlag, áðrenn avgjaldið varð álagt.
Harumframt greiddi hann frá, at felagið ikki hevði virksemi, og at hvørki skaði ella vinningur stóðst av seinkingini.
Ábyrgdin liggur hjá leiðsluni
Skráseting Føroya helt kortini fast við avgjaldið.
Myndugleikin vísti á, at áminningin eisini varð send til skrásetta bústaðin hjá felagnum. Hetta brævið kom ikki aftur.
Sambært ársroknskaparlógini kann ein leiðslulimur bert undir heilt serligum umstøðum sleppa undan avgjaldi fyri ov seint innlatnan ársroknskap.
Eitt mistak hjá einum bókhaldara ella øðrum ráðgeva frítekur ikki í sjálvum sær leiðsluna fyri ábyrgd.
Kærustovnurin gav ikki viðhald
Føroya Kærustovnur tekur undir við metingini hjá Skráseting Føroya.
Kærustovnurin vísir á, at hvørki tað, at stjórin ikki fekk áminningina, ella eitt møguligt mistak hjá bókhaldaranum er nóg mikið til at sleppa undan avgjaldinum.
Avgerðin hjá Skráseting Føroya verður tí staðfest, og stjórin má rinda tær 2.000 krónurnar.
