Framyvir fara ríkismyndugleikar, eitt nú løgreglan í Føroyum, at flagga við Merkinum á ólavsøku og á flaggdegnum, umframt aðrar dagar.
Hetta er greitt eftir at Sambandsflokkurin á fólkatingi hevur gjørt avtalu við danska løgmálaráðið.
Tað merkir, at reglur eru gjørdar fyri, nær flaggað verður við Merkinum, Erfalasorput, sum er grønlendska flaggi, og Dannebrog.
– Hetta er eitt stig á leiðini móti einum meira nútímans ríkisfelagsskapi, har ymsu londini fáa alsamt størri rúmd, sigur Anna Falkenberg í tíðindaskrivi.
Framyvir fer Merkið at veittra uttanfyri ríkismyndugleikunum á grækarismessu, flaggdegnum, jóansøku, ólavsøkuaftan, ólavsøkudag. Á allahalgannadegnum verður flaggað við hálvari stong.
– Somuleiðis fara allir ríkisstovnar í Danmark, Føroyum og Grønlandi at flagga við Merkinum á ólavsøku. Hinvegin fara ríkisstovnarnir at flagga við Erfalasorput á tjóðardegi Grønlands hin 21. juni.
– Ein nútímans ríkisfelagsskapur snýr seg ikki bara um at hava gott samstarv, men eisini um at viðurkenna og rúma ymsu londini og siðirnar, sum eru partur av ríkisfelagsskapinum; sigur Anna Falkenberg.
Hon fegnast um, at danska stjórnin er gingin ynskjunum á møti.
– Broytingarnar kunnu sostatt síggjast sum eitt ítøkiligt framstig í arbeiðinum at menna ein nútímans ríkisfelagsskap, har virðingin fyri londunum í ríkisfelagsskapinum verður uppraðfest, sigur hon.
