Hósdagin 3. september flytur Elsa Berg, borgarstjóri í Tórshavnar kommunu, skrivstovuna til Kaldbaks. Endamálið er at kunna seg um staðbundin viðurskifti og geva fólki í Kaldbak høvi at hitta borgarstjóran og taka upp mál, sum liggja teimum á hjarta.

– Eg gleði meg at koma eitt sindur runt í bygdini og at práta við fólk, ið koma á gátt, sigur Elsa Berg.

Klokkan 12.30 fara borgarstjórin, umsitingin og staðbundna nevndin runt í bygdini at kunna seg um ymisk viðurskifti.

Borgarstjórin tekur ímóti í Høllini

Frá klokkan 14 til 17 verður Elsa Berg at hitta í Høllini í Kaldbak, og øll eru vælkomin.

Fyrr í ár flutti borgarstjórin eisini skrivstovuna út í Hest og til Velbastaðar. Í august vitjaði hon Kirkjubø saman við umsitingini og staðbundnu nevndini. Ætlanin er at vitja aðrar bygdir í kommununi komandi tíðina.