Vísindaklubbin á Glasi bjóðar í heyst børnum í 4. og 5. flokki at ganga til heimsspeki í frítíðini. Børnini skulu millum annað kjakast um rætt og skeivt og kanna stórar og forvitnisligar spurningar.

Fýra næmingar á Glasi skulu undirvísa børnunum. Tey hava verið á skeiði saman við øðrum næmingum úr Føroyum og Danmark og eru nú til reiðar at taka ímóti børnunum.

– Vit gleða okkum ordiliga nógv, tí tað er mega stuttligt at filosofera saman við øðrum, sigur Róar Rúnason, sum er ein av undirvísarunum.

Børnini skulu arbeiða við hugsanarroyndum og ymiskum tvístøðum, sum tey saman kanna við heimsspekiligum amboðum.

Heimsspekiklubbin verður á Glasi týsdagar klokkan 15.00–16.30 í vikum 43–49.