Í august í ár vórðu 32 innflutt brúkt akfør skrásett, samanborið við 18 í sama mánaði í fjør. Tað er ein vøkstur upp á 14 akfør, ella knappliga 78 prosent.

Stóri munurin stavar fyrst og fremst frá persónbilum. Í august vórðu 21 innfluttir brúktir persónbilar skrásettir, meðan talið var sjey í august í fjør. Talið er sostatt trífaldað eftir einum ári.

226 brúkt akfør higartil í ár

Verður hugt at fyrstu átta mánaðunum undir einum, er vøksturin tó munandi minni. Frá januar til august vórðu 226 innflutt brúkt akfør skrásett. Sama tíðarskeið í 2025 var talið 216.

Talan er sostatt um ein vøkstur upp á tíggju akfør, svarandi til 4,63 prosent.

Av teimum vóru 106 persónbilar, seks fleiri enn somu mánaðir í fjør.

Vøruvognar vaksa nógv

Lutfalsliga er størsti vøksturin millum vanligu akfarssløgini í vøruvognum. Higartil í ár eru 26 vøruvognar skrásettir, samanborið við 16 í fjør. Tað svarar til ein vøkstur upp á 62,5 prosent.

Eisini talið á viðfestivognum er vaksið nógv, úr 15 upp í 22, svarandi til 46,67 prosent. Hinvegin er talið á lastbilum minkað úr 24 niður í 18.