Bussferðafólk í Tórshavnar kommunu fáa nú betri umstøður at standa í lívd fyri regni og vindi, meðan tey bíða eftir bussinum.

Sjey nýggj bussskýli eru sett upp ymsastaðni í kommununi, og tvey afturat verða sett upp í næstu viku.

Sambært Tórshavnar kommunu hava fleiri borgarar biðið um fleiri bussskýli. Kommunan hevur tí gjørt sáttmála við fyritøkuna Dygdarverk um at gera og seta nýggju skýlini upp.

Nýggj skýli í fleiri býarpørtum

Nýggju bussskýlini eru sett upp á Staravegnum, Millum Gilja, á Dalavegnum og á Karlamagnusarbreyt.

Í næstu viku verða tvey skýli afturat sett upp. Annað verður í Hornabø og hitt á Marknagilsvegnum.

Við nýggju skýlunum fáa fleiri bussferðafólk møguleika at standa undir taki, meðan tey bíða eftir bussinum.

Tilsamans eru 188 busssteðgistøð í Tórshavnar kommunu.

Sambært kommununi hava 125 teirra bussskýli frammanundan. Nú koma níggju nýggj skýli afturat.

Kommunan upplýsir ikki, hvussu nógv nýggju bussskýlini kosta.