Føroya Kærustovnur hevur staðfest avgerðina hjá Studna um at sýta einum lesandi stuðul til lestur uttan fyri Føroyar. 

Málið snýr seg um bústaðartreytirnar í lógini um lestrarstuðul. 

Studni sýtti umsóknini, tí kærarin sambært Landsfólkayvirlitinum hvørki hevði búð í Føroyum í tvey av teimum seinastu trimum árunum beint undan lestrarbyrjan ella helvtina av lívinum undan lestrarbyrjan.

Vísti á umleið 10 ára tilknýti

Kæruumboðið helt kortini, at kærarin lúkti treytunum. Víst varð á, at kærarin hevði búð og hildið til í Føroyum í tíðarskeiðum, sum tilsamans góvu honum umleið 10 ára beinleiðis tilknýti til Føroyar.

Kæruumboðið vísti eisini á, at tað ikki er vanligt, at eitt barn hevur skrásettan bústað í Føroyum, tá tað vitjar ommu, abba, fastur ella systkinabørn.

Sambært lógini kann stuðul til lestur uttan fyri Føroyar veitast teimum, sum hava búð í Føroyum í minst tvey av teimum seinastu trimum árunum beint undan lestrarbyrjan ella í helvtina av lívinum undan lestrarbyrjan.

Skrásetingin í Landsfólkayvirlitinum gjørdist avgerandi

Føroya Kærustovnur legði dent á, at kærarin ikki hevði verið skrásettur í Landsfólkayvirlitinum í umrødda tíðarskeiðinum.

Kærustovnurin tulkar orðingina „hevur búð í Føroyum“ soleiðis, at talan er um at hava havt skrásettan bústað í Føroyum sambært Landsfólkayvirlitinum. Tí varð niðurstøðan, at kærarin ikki lúkti bústaðartreytunum, og avgerðin hjá Studna varð staðfest.