Klaksvík er í juli karmur um fleiri evropeiskar dystir. KÍ legði fyri týsdagin við 2-1-sigri á FC Atert Bissen úr Luksemborg. NSÍ spældi javnleik 1-1 9. juli ímóti Hamrun Spartans úr Malta, og í næstu viku skal Víkingur spæla ímóti Stjarnan úr Íslandi.
Nýggja hornaskýlið var avgerandi
Karl Johansen, borgarstjóri í Klaksvíkar kommunu, fegnast um, at feløg úr Eysturoynni hava valt Djúpumýru sum heimavøll til altjóða dystir.
– Vit hava rættiliga góðar umstøður til evropeiskar dystir í Klaksvík, sigur hann.
Nýggja hornaskýlið hevur gjørt tað møguligt at fáa endaliga góðkenning. Leikvøllurin hevði áður fyribils góðkenning, men hevur nú fingið FIFA Quality Pro-góðkenning.
Fleiri áskoðarapláss og betri høli
Áskoðaraplássini eru munandi fleiri enn áður. Økið kring leikvøllin hevur eisini fingið nýggj skiftingarrúm, venjarahøli, dómarahøli, skrivstovuhøli og aðrar umstøður, sum lúka altjóða krøv.
Við góðkenningini kann Djúpumýra nú hýsa fleiri altjóða dystum.
