Í eini samrøðu við Kringvarp Føroya  sigur varapolitinspektørurin Heri Andreasen, at nýggj tøkni hevur gjørt tað munandi lættari hjá føroysku løgregluni at avdúka kynsbrot móti børnum á netinum.

Í ársfrágreiðingini hjá løgregluni fyri 2025 verður víst á, at kynsbrot og barnamisnýtsla eru vaksandi avbjóðingar, og at internetið og sosialir miðlar hava broytt mynstrið fyri hesi brotsverkini.

Síðani løgreglan í 2022 fekk atgongd til amerikanska National Center for Missing & Exploited Children (NCMEC), hava tey fingið umleið 1.500 fráboðanir um møgulig brot.

Umleið ein fjórðingur av teimum verða mett sum verulig mál og kannað víðari.