Foreldur og onnur, sum hava rætt til endurgjald fyri mista arbeiðsinntøku í sambandi við ansing, kunnu nú fáa upp í 31.000 krónur (31.000 DKK) um mánaðin.
Hetta er ásett í einari nýggjari kunngerð frá Almanna- og bústaðamálaráðnum, sum broytir reglurnar um endurgjald fyri mista arbeiðsinntøku.
Sambært galdandi áseting var hægsta endurgjaldið í 2024 26.814 krónur um mánaðin. Í 2026 verður hámarkið hækkað til 31.000 krónur.
Nýggj regla um inntøkugrundarlagið
Samstundis verður ein nýggj regla sett í gildi um, hvussu inntøkugrundarlagið kann ásetast í serligum førum.
Inntøkugrundarlagið kann verða ásett til 80 prosent av hægst møguliga endurgjaldinum, um ávísar treytir eru loknar.
Ein treyt er, at endurgjaldið fyri mista arbeiðsinntøku í 24 av teimum seinastu 36 mánaðunum hevur verið lægri enn 80 prosent av hægst møguliga endurgjaldinum.
Harumframt skal endurgjaldið vera lægri enn tann inntøkan, sum Almannaverkið metir, at persónurin undir vanligum umstøðum hevði havt.
Kunngerðin er dagfest 4. august 2026 og varð givin út 7. august.
Sambært kunngerðini kemur hon í gildi dagin eftir, at hon er kunngjørd. Tað merkir, at broytingarnar komu í gildi 8. august 2026.
