Íslendski stovnurin Netvís, sum hevur abyrgd av trygd á netinum, hevur latið upp eina serliga fráboðanar-heimasíðu, har fólk kunnu boða frá illgrunasomum tilfari á netinum undan fólkaatkvøðuni 29. august.

Á fólkaatkvøðuni skulu íslendingar taka støðu til, um samráðingarnar um limaskap í ES skulu halda fram. Enn eru ongar illgrunasamar fráboðanir komnar, men Netvís væntar, at falskar og villleiðandi upplýsingar fara at økjast í tali, tá valstríðið harðnar.

Stovnurin samstarvar við løgregluna og fyritøkurnar, sum reka sosialar miðlar. Endamálið er at fáa álvarslig mál kannað og falskar og teldustýrdar brúkarakontur og annað villleiðandi tilfar strikað.

Halla Tómasdóttir, forseti Íslands, heitir samstundis á fólk um at steðga á, kanna keldurnar og kjakast við virðing.

– Tað er púra vanligt, at vit hava ymisk sjónarmið um eitt so týdningarmikið mál. Tað er fólkaræði, sigur hon.