Tórshavnar býráð samtykti 5. mai at senda eitt uppskot um broyting av serstøku byggisamtyktini nr. 7 fyri Eysturbýin í almenna hoyring.

Uppskotið snýr seg um matrikkulnumrini 1314 og 1303b í Havn. Økið skal eftir ætlan skipast til íbúðarbygging við tilhoyrandi hentleikum og fríøkjum.

Framløga verður mánadagin

Kommunan bjóðar nú øllum áhugaðum til almenna framløgu um íbúðarverkætlanina. Framløgan verður í Posthúskjallaranum í Tórsgøtu 8 mánadagin 22. juni klokkan 17.

Freistin at lata inn mótmæli ella broytingaruppskot er 1. juli 2026. Tilfarið liggur eisini frammi í Snarskivuni til sama dag.

Økið verður broytt til íbúðir

Broytingin merkir, at partar av økinum verða lagdir um til eina nýggja B5-eind til íbúðarbygging.

Í hesi eindini kann nýtslustigið verða upp í 0,70 fyri økið sum heild. Sambært heildarbyggiætlanini kunnu bygningar á summum støðum verða upp í seks hæddir.