Nú fer Landsstýrið at herða krøvini til teir útlendingar, sum vilja fáa varandi uppihaldsloyvi í Føroyum. Tað sigur Jacob Vestergaard, landsstýrismaður í vinnumálum.

Hermann Ronnason Samuelsen, løgtingsmaður fyri Sambandsflokkin, hevur spurt hann um krøvini fyri at fáa varandi uppihaldsloyvi í Føroyum

Tá ið útlendingar vilja sleppa at búsetast í Føroyum, skulu teir lúka ymsar treytir. Ein treyt er, at skylda teir tí almenna meiri enn 97.436,38 krónur, kunnu teir ikki fáa varandi loyvi at búsetast í Føroyum, uttan so at teir hava gjørt avtalu um at rinda skuldina aftur - og halda hesa avtaluna.

Landsstýrismaðurin sigur, at eingi krøv um at tey skulu duga føroyskt.

Tað hevur kortini verið føst mannagongd, at útlendingar ið vilja fáa varandi uppihaldsloyvi í Føroyum, skulu til eina integratiónssamrøðu og har skulu tey kunna vísa á, at tey hava nomið sær føroyskan málkunnleika umframt vitan um føroyska mentan og føroyska samfelagið.

Tað er eisini ein treyt, at tey, sum koma higar, skulu hava so frægt at inntøku, at tey kunnu forsyrgja sær og sínum.

Men Jacob Vestergaard sigur, at í løtuni verður arbeitt við einari nýggjari útlendingalóg fyri Føroyar, har ætlanin er at herða treytirnar fyri at fáa varandi uppihaldsloyvi í Føroyum. Ein treyt skal vera, at útlendingurin skal hava lokið prógv í føroyskum á einum ávísum stigi, áðrenn hann kann fáa varandi uppihaldsloyvi í Føroyum.