Í gjárkvøldið varð ringt til løgregluna tí ein maður var so ófantaligur í sínum atburði, at tey vóru ikki heilt trygg.

Løgreglan sigur, at tá ið tey komu á staðið, vísti tað seg, at maðurin vildi heldur ikki siga hvør hann var.

Fólk kunnu annars lúgva so galið tey vilja fyri løgregluni, men tað einasta, fólk hava skyldu at upplýsa, er, hvørji tey eru, nær tey eru fødd og hvar tey búgva.

Men tað vildi hesin ikki siga, so hann varð handtikin og lagdur í brummuna, og hann varð ikki leyslatin aftur fyrr enn nú í morgun.

Men hetta nummarið kostaði honum tvær bøtur, fyrst fekk hann 1.000 krónur í bót fyri ikki at siga hvør hann var, og so fekk hann 1.500 krónur afturat í bót fyri at bróta skilhaldsreglurnar við sínum ólátaða atburði.