Endamálið er at geva fólki í ferðavinnuni betri kunnleika til tey tilboð og tær upplivingar, sum eru í økinum. Serliga verða starvsfólk, sum dagliga hava samband við ferðafólk, eggjað til at luttaka. Tað kunnu eitt nú vera starvsfólk á kunningarstovum, ferðaskrivstovum, gistingarhúsum og matstovum.

Vitja fleiri lokal tilboð

Á ferðini fáa luttakararnir høvi at hitta lokalar veitarar og sjálvir uppliva nakað av tí, sum Kvívíkar kommuna hevur at bjóða. Skráin fevnir millum annað um Kvívikknit, Svanhild by FO, IPG-savnið og útgrevsturin í Kvívík. Síðani verður farið til Stykkis og Leynar, har Havdypp og Trælist verða vitjað.

Tiltakið er fyri limir í Ferðavinnufelagnum og starvsfólk teirra. Økisvitjanin verður mánadagin 28. september frá klokkan 13.00 til 17.30. Freistin at melda til er mikudagin 23. september.