Útflutt varð fyri 13,246 milliardir krónur. Tað er ein vøkstur upp á 1,66 milliardir krónur, svarandi til 14,3 prosent samanborið við undanfarna skeiðið.
Samlaði vøruútflutningurin var nærum 14 milliardir krónur. Serliga laksur og toskur drógu vøksturin upp.
Útflutningsvirðið á laksi vaks við 477 milliónum krónum til 6,23 milliardir krónur. Samstundis vaks útflutta nøgdin við 26,7 prosentum til 115.409 tons.
Toskaútflutningurin vaks við 343 milliónum krónum til nærum 1,5 milliardir krónur. Tað svarar til ein vøkstur upp á 29,7 prosent.
ES-marknaðurin dró størsta vøksturin
Størsti vøksturin í fiskavøruútflutninginum var til ES, har útflutningurin vaks við 1,34 milliardum krónum til 6,8 milliardir krónur. Útflutningurin til Niðurlond vaks við 288 milliónum krónum, meðan útflutningurin til Spania vaks við 258 milliónum krónum.
Útflutningurin til Kina vaks eisini nógv. Kina stóð fyri góðum 243 milliónum krónum av samlaða vøkstrinum til asiatiska marknaðin. Árligi útflutningurin til Kina er nú farin upp um eina milliard krónur.
Sambært Hagstovu Føroya eru sjey lond nú omanfyri eina milliard krónur í árligum keypi av føroyskum fiskavørum. Tey eru USA, Spania, Danmark, Bretland, Russland, Niðurlond og Kina.
Makrelur og fiskamjøl drógu niður
Ikki øll fiskasløg høvdu framgongd. Útflutta nøgdin av makreli minkaði við 19,8 prosentum, hóast virðið vaks við 15,4 prosentum.
Samstundis minkaði útflutningsvirðið á fóðri við 33 prosentum og á fiskamjøli við 22,8 prosentum.
Hagstova Føroya staðfestir kortini, at útflutningurin av so at siga øllum fiskasløgum er vaksin í virði seinasta árið.
