Føroyar liggja væl fyri til eina rúmdarvinnu. Tað heldur Bjarni Kárason Petersen, løgtingsmaður fyri Framsókn.

Tí vil hann nú hava Jacob Vestergaard, landsstýrismann í vinnumálum, at greiða frá, hvat hann heldur um, at vit skulu leggja okkum eftir at fáa eina rúmdarvinnu í Føroyum  

– Rúmdarvinnan er ein skjótt vaksandi vinna kring heimin, og stórveldini brúka nógva tíð og orku til at menna sína rúmdarvinnu, staðfestir Bjarni Kárason Petersen

Hann sigur, at hetta er eisini galdandi fyri londini í Evropa.

Men hann staðfestir somuleiðis, at Føroyar liggja væl fyri til at hava eina rúmdarvinnu.

– Hetta, og so tað, at Evropa vil hava sínar egnu førleikar innan rúmdarvinnu, skapar fortreytirnar fyri, at Føroyar kunnu vera ein miðdepil fyri rúmdarvinnu í Evropa, sigur tingmaðurin fyri Framsókn.

Hann sigur, at Føroyar liggja soleiðis fyri at tað ber til at gera móttøkustøðir til at heinta dátur frá teimum rakettum og fylgisveinum, ið ferðast í føroyskum øki.

Føroyar liggja eisini væl fyri til eina rakettstøð, sum kann senda lítlar og miðalstórar rakettir í ringrás.

Bjarni Kárason Petersen leggur tó afturat, at ein framtíðar rúmdarvinna í Føroyum kann tó hava ávirkan á umhvørvið, loftrúm, trygd, fiskiskap og mangt annað, og tí má eisini leggjast upp fyri slíkum viðurskiftum.