Føroyar missa ein fimting av hvørjum ungdómsárgangi, tí helvtin av teimum, ið fara uttanlands at lesa, ikki kemur aftur. Samstundis hevur barnatalið í fleiri ár verið ov lágt til at varðveita fólkatalið.

Hetta er ein av størstu framtíðaravbjóðingunum hjá Føroyum, sambært ársfrásøgnini hjá Føroya Arbeiðsgevarafelag. Felagið ávarar um eina neilaga gongd, har eitt minkandi fólkatal ger samfelagið minni fjølbroytt og minni spennandi. Tað kann aftur fáa enn fleiri ung at velja Føroyar frá.

Bústaðir og størv skulu venda gongdini

Skulu fleiri ung velja Føroyar, mugu karmarnir betrast. Føroya Arbeiðsgevarafelag vísir serliga á tørvin á fleiri smærri íbúðum og leigubústøðum.

Ung skulu hava ein veruligan møguleika at sleppa inn á bústaðarmarknaðin. Felagið mælir eisini til fleiri útstykkingar og skjótari viðgerð av matrikuleringum og byggiloyvum.

Úrvalið av størvum skal eisini gerast størri. Tað krevur sambært felagnum einfaldari vinnukarmar og betri møguleikar hjá nýggjum fyritøkum at verða stovnaðar og vaksa.

Fleiri skulu útbúgva seg í Føroyum

Útbúgvingartilboðini í Føroyum skulu í størri mun samsvara við áhugan hjá teimum ungu og tørvin hjá samfelagnum.

Góðskan skal vera høg, og útbúgvingarnar skulu vera viðkomandi og dagførdar. Samstundis eigur tað at bera til at taka partar av útbúgvingini uttanlands.

Boðskapurin er greiður: Tess fleiri ung útbúgva seg í Føroyum, tess størri eru sannlíkindini fyri, at tey eisini velja at búgva og arbeiða her eftir loknan lestur.