Føroyar vilja styrkja handilssambandið við Brasil og hava nú lagt fram uppskot um ein handilssáttmála við Brasil og Mercosur. Uppskotið varð lagt fram á fundum við brasilskar myndugleikar.
Landsstýrismaðurin í uttanríkis- og fiskivinnumálum, Bárður á Steig Nielsen, er í Brasília, har hann hevur fundir við umboð fyri bæði stjórnina og vinnulívið.
Vilja hava betri marknaðaratgongd
Endamálið við ferðini er at leggja grundarlag undir betri marknaðaratgongd og økt samstarv innan vinnu, samhandil og samfelagsmenning.
Á fundum í forsetaskrivstovuni og handils- og vinnumálaráðnum hevur landsstýrismaðurin víst á, at Føroyar vilja endurnýggja søguliga handilssamstarvið við Brasil og laga tað til ein nútímans handilskarm.
Føroyakvøld savnaði umleið 100 gestir
Í sambandi við vitjanina varð eisini skipað fyri einum føroyakvøldi á donsku sendistovuni. Umleið 100 gestir vóru við.
Endamálið var at varpa ljós á Føroyar og styrkja sambondini við brasilskt vinnulív, myndugleikar og onnur áhugað. Fleiri fundir eru á skránni komandi dagarnar.
