Føroyar liggja á 13. plássi av 27 londum eftir fyrsta kappingardagin í EM fyri unglingalandslið í dart í Írlandi.

Fýra ungir leikarar umboða Føroyar: Nói Reinert Djurhuus úr Innan Glyvur, Sámuel Rasmussen av Strondum, Jóni Kjærbo úr Tórshavn og Dávur Berg úr Klaksvík. Nói og Sámuel spæla við Skála Dartfelagi.

Avgerandi sigrar tryggjaðu framhald

Dávur og Nói máttu vinna seinasta bólkadystin móti einum sterkum íslendskum pari. Teir vunnu sannførandi 3-1.

Jóni og Sámuel skuldu vinna á bæði Fraklandi og Luksemborg fyri at koma víðari. Tað eydnaðist, og sostatt spældu bæði føroysku pørini seg úr bólkaspælinum.

Í 1/16-finalunum gjørdist mótstøðan ov sterk. Jóni og Sámuel taptu fyri einum sterkum enskum pari, har Kaya Baysal var annar leikaranna. Dávur og Nói taptu greitt fyri einum pari úr Lettlandi.