Føroyska fiskivinnan verður umboðað, tá altjóða fiskivinnuráðstevnan IIFET 2026 verður hildin í Føroyum 17.–21. august.

Magni Laksáfoss frá Blue Resource og Sjókovanum fer at leggja fram vitan um oljunýtsluna hjá føroyska fiskiflotanum. Framløgan verður partur av eini serligari ráðstevnusetu um nýskapan, sum kann minka um bæði veðurlagsárinini á fiskivinnuna og útlátið frá vinnuni.

Sambært MarineGuardian ávirka veðurlagsbroytingar longu fiskastovnar, livikorini í strandasamfeløgum og búskapin í fiskivinnuni. Tí verður dentur lagdur á, hvussu vinnan kann laga seg at broyttu umstøðunum og samstundis minka um sítt egna útlát.

Unn Laksá leiðir altjóða ráðstevnusetuna

Unn Laksá frá Blue Resource og Sjókovanum verður orðstýrari á ráðstevnusetuni.

Granskarar úr Noregi, Grikkalandi, Íslandi og Føroyum fara at viðgera umsiting av fiskastovnum í einum alsamt heitari landnyrðingsparti av Atlantshavinum, fremmandar djórategundir, veðurlagstilpassing og nýskapandi fiskireiðskap, sum kann minka um útlátið.

Ingrid Solstad Andreassen og Tiziana Melchiorre frá UiT – Noregs arktiska universiteti – eru millum luttakararnar. Dimitris Kirmoutselis frá Landbúnaðaruniversitetinum í Aten og Jonas Vidarsson frá íslendska granskingarstovninum Matís fara eisini at leggja fram.

Altjóða fiskivinnufundur í Føroyum

IIFET 2026 verður lýst sum ein altjóða pallur fyri burðardyggan fiskiskap og burðardygga alivinnu. Ráðstevnan savnar granskarar, myndugleikar og umboð fyri vinnuna at viðgera fiskivinnubúskap og framtíðar avbjóðingar.

Freistin at lata inn samandráttir er farin, men enn ber til at skráseta seg til ráðstevnuna, upplýsir MarineGuardian.