Jóannes Purkhús, sóknarprestur í Norðoya eystara prestagjaldi, skal mikudagin 22. juli klokkan 15.00 verja doktararitgerð sína í gudfrøði við Universität Münster í Týsklandi.

Ritgerðin er latin inn til tess at vinna akademiska heitið Dr. theol. Verjan verður á deildini fyri protestantiska gudfrøði.

Jóannes hevur arbeitt við granskingini, samstundis sum hann hevur røkt prestastarvið eystan Múla. Hann hevur verið innskrivaður sum doktaralesandi við universitetið í Münster síðan 2019.

Vegleiðari hansara hevur verið Eve-Marie Becker, professari í Nýggja Testamenti við Universität Münster.

Paulus og trælamálburður

Ritgerðin eitur Doulos in and around Paul. A Semantic Analysis of Paul’s Slavery Language in its Contexts.

Í ritgerðini greinar Jóannes Purkhús, hvussu Paulus nýtir orð og myndir úr trælahaldi í brøvum sínum og í gudfrøðiligari próvførslu.

Har verður víst á, at Paulus brúkar trælamálburð á ein nýskapandi og fjølbroyttan hátt, lagaðan eftir innihaldinum í einstøku brøvunum.

Ritgerðin samanber eisini málburðin hjá Paulusi við málburð hjá øðrum høvundum úr griksk-rómverskari tíð.