Árliga verða umleið 64.000 tons av burturkasti framleidd í Føroyum. Heili 57 prosent stava frá vinnuni. Nú skulu nýggir burturkastambassadørar hjálpa fyritøkum at fáa betri skil á burturkastinum.

Varandi Vinna hevur saman við IRF og Kommunalu Brennistøðini skipað fyri einum sjey vikur longum skeiði, har útvið 40 starvsfólk frá 13 fyritøkum hava luttikið.

Skulu skapa ítøkiligar broytingar

Luttakararnir hava vitjað IRF á Hagaleiti og Kommunalu Brennistøðina á Hjalla. Har hava tey fingið innlit í, hvussu burturkast verður viðgjørt og endurvunnið.

Samstundis hava tey arbeitt við ætlanum um at bøta um burturkastskiljingina á sínum arbeiðsplássum.

– Vit fegnast um góðu undirtøkuna. Tað vísir, at fyritøkur vilja taka ábyrgd og gerast betri til at skilja burturkast, sigur Súsanna Berg, ráðgevi í burðardygd í Vinnuhúsinum.

Hon leggur dent á, at vitanin skal føra til ítøkiligar broytingar á arbeiðsplássunum.