Fuglafjarðar býráð góðkendi 28. mai ársroknskapin fyri 2025, sum vísir eitt rakstraravlop á 25,5 milliónir krónur. Samstundis vóru nettoíløgurnar nærum 40 milliónir krónur, og skuldin hjá kommununi vaks munandi.
Skuldin vaks hóast gott rakstrarúrslit
Samlaðu nettoíløgurnar vóru 39,6 milliónir krónur. Tað var 6,4 milliónir krónur minni enn ætlað, tí at nakrar verkætlanir vórðu útsettar til komandi ár.
Tá ið rakstur og íløgur verða lagd saman, gjørdist úrslitið eitt hall á 13,9 milliónir krónur. Kortini var hetta 10,9 milliónir krónur betri enn roknað varð við í fíggjarætlanini.
Eldraøkið og havnin trýstu raksturin
Kommunan hevði hægri inntøkur frá A-skatti og B-skatti, men rakstrarútreiðslurnar gjørdust 96 milliónir krónur. Tað var 3,6 milliónir krónur meira enn mett. Orsakirnar vóru millum annað størri tørvur á eldraøkinum og lægri nettoinntøkur á Fuglafjarðar havn.
Rakstur og íløgur á almanna-, heilsu-, barna- og ungdómsøkinum stóðu fyri 43 prosentum av fíggjarætlanini í 2025, samanborið við 48 prosent árið frammanundan.
Við árslok 2025 svaraði kommunuskuldin til 60 prosent av skattaálíkningini móti 52 prosentum í 2024.
