Klokkan 11.30 í dag var ríkisráð hildið á Kongaslottinum í Oslo. Fyri fyrstu ferð, eftir at hann var kongur, stýrdi Haakon sjálvur ríkisráðnum.

Í ríkisráðnum kunngjørdi hann, at hann hevur valt at taka konganavnið Haakon VIII.

Í síni fyrstu fráboðan til ríkisráðið sum kongur boðaði Haakon frá, at faðir hansara er deyður, og at hann nú hevur tikið við sum kongur í Noregi.

Hann takkaði samstundis stjórnini og norska fólkinum fyri stuðulin og samhugan, sum familjan hevur fingið í hesi truplu tíð.

Við kongaskiftinum broytast eisini heitini hjá fleiri í kongafamiljuni.

Mette-Marit, sum higartil hevur verið krúnprinsessa, er nú drotning.

Ingrid Alexandra, sum er elsta barn hjá Haakoni og Mette-Marit, er vorðin krúnprinsessa og er harvið fyrst í arvarøðini til norsku trónuna eftir pápa sín.

Sonja drotning heldur fram við at vera heitið drotning, men er ikki longur sitandi drotning.

Sverre Magnus prinsur varðveitur sítt verandi heiti, og tað gera Märtha Louise prinsessa og Astrid prinsessa eisini.

Haakon VIII hevur valt at halda fast við eina siðvenju, sum røkkur aftur til langabba hansara, Haakon VII.

Valsprógvið Alt fyri Noreg hevur fylgt norsku kongunum í fleiri ættarliðum og verður nú eisini valsprógvið hjá nýggja konginum.

Kongaskiftið merkir sostatt, at Noreg hevur fingið nýggjan kong eftir eitt langt og søguligt tíðarskeið undir Haraldi V.