Hóast Spania vann HM-gullið, er tað Erling Braut Haaland, sum hevur fingið størstu altjóða umrøðuna uttan fyri vøllin.

Norski áleyparin endaði sum triðbesti málskjúttin, og undir HM vaks talið av Instagram-fylgjarum hansara úr umleið 40 upp í meira enn 72 milliónir.

Sambært NRK hevur Haaland eisini gjørt tað meira populert at eta norskan mat. Rákið verður kallað at vera norsketarianari, har dentur verður lagdur á fisk, kjøt og aðrar góðskurávørur úr Noregi.

Ein norskur granskari sigur, at nógv ung ynskja at síggja út og avrika sum Haaland. Tí velja fleiri at fylgja kostinum hjá honum, sum leggur dent á staðbundnar matvørur, góða góðsku, færri spreiðievni og minni nýtslu av antibiotika.

Hetta hava fleiri virkir sum framleiða matvørur, longu gjørt sær dælt av, og nýta Haaland í teirra marknaðarførslu.

Haaland-fepurin sæst eisini aftur í Peru. Sambært peruansku fólkaskrásetingini Reniec hava 468 fólk í seinastuni fingið navnið Haaland. 91 eita Erling Haaland, og fýra bera alt navnið Erling Braut Haaland.

Í handilsøkinum Gamarra í høvuðsstaðnum Lima siga handilsfólk eisini, at sølan av blusum við Haaland-prenti er vaksin nógv.

Ávirkanin hjá Haaland røkkur sostatt langt út um fótbóltsvøllin og sæst bæði í matvanum, navnavali og sølu av vørum kring heimin.