Meta hevur hækkað fíggjarætlanina munandi fyri byggingina av sínum dátumiðdepli í Richland Parish, í amerikanska statinum Louisiana.

Sambært CNBC verður væntað, at verkætlanin nú fer at kosta meira enn 50 milliardir dollarar, svarandi til umleið 328 milliardir krónur.

Tað er ein stór hækking samanborið við tær 27 milliardir dollarar, sum felagið boðaði frá í oktober.

Útbyggingin er partur av stóru íløgum hjá Meta í vitlíki, har felagið arbeiðir við at økja um orkuna fyri at nøkta vaksandi eftirspurningin eftir vitlíkis-tænastum.

Samstundis hevur republikanski guvernørurin í Louisiana, Jeff Landry, innført 20 ára langa skattalættan fyri dátumiðdeplar, sum verða bygdir áðrenn 2029.

Byggingin hevur tó ikki verið uttan mótstøðu. Fleiri íbúgvar og umhvørvisfelagsskapir hava mótmælt verkætlanini og vísa á, at eitt so stórt dátusentur fer at krevja nógv streym og vatn.

Samstundis óttast tey ávirkanina á umhvørvið og lokalsamfelagið.