Nú er gjørt av, at tað skal vera Anna Mohr Holm, sum skal vera nýggjur stjóri í tryggingarfelagnum, Trygd. Hon avloysir Brian Smedemark, ið hevur verið stjóri seinastu fimm árini.
Í juni varð kunngjørt, at stjórin í Trygd, Brian Smedemark, fer í nýtt starv sum rakstrarstjóri í BankNordik. Í tí sambandi varð stjórastarvið í Trygd lýst leyst, og í dag er Anna Mohr Holm sett sum nýggjur stjóri. Hon tekur við starvinum tann 1. september.
Anna er 47 ára gomul, hon er løgfrøðingur og hevur drúgvar royndir úr føroyska tryggingarheiminum. Eitt skifti var hon deildarleiðari í Trygd, og seinastu árini hevur hon starvast í Betri Trygging.
Frá vinstru eru tey Brian Smedemark, fráfarandi stjóri í Trygd, Anna Mohr Holm, nýggjur stjóri í Trygd, og Turið F. Arge, forstjóri í BankNordik-samtakinum og nevndarforkvinna í Trygd.
