Tíggju námsfrøðingar og hjálparfólk á dagstovnaøkinum í Vestmanna vórðu fríggjadagin heiðrað fyri drúgva og trúgva tænastu. Nøkur av teimum hava starvast á økinum í heili 25 ár.
Heiðursløtan var eitt tekin um støðufesti á einum øki, har fleiri av starvsfólkunum hava verið við, síðan fyrsti barnagarðurin í Vestmanna læt upp um aldarskiftið. Onnur hava starvast á økinum heilt síðan dagrøktarskipanin varð sett á stovn.
Fleiri áratíggju í tænastu hjá børnunum
Samkoman varð hildin í Spælhúsinum á bedingini, har starvsfólk, familjur og starvsfelagar vóru komin saman at hátíðarhalda dagin.
Vestmanna kommuna vísir á, at drúgvi starvsaldurin er eitt greitt tekin um trivnað, trúskap og sterka ábyrgdarkenslu. Hetta hevur verið til stórt gagn fyri børn, foreldur og kommununa sum heild.
Røður, tónleikur og gávur
Morten Hust Petersen, dagstovnaleiðari, og Sára Jógvansdóttir, borgarstjóri, hildu røður og takkaðu starvsfólkunum fyri trúfesti og dugnasemi. Eisini framførdu Pauli Magnussen og Kirstin Johannesen nakrar sangir. At enda handaði Anja Haldansen, forkvinna í trivnaðarnevndini, gávur til heiðursgestirnar.
Tvey starvsfólk vórðu heiðrað fyri 25 ára starvsaldur, sjey fyri 20 ára starvsaldur og eitt fyri 15 ára starvsaldur.
