Fleiri flogfør í Evropa hava verið fyri hóttanum. Millum teirra er eitt SAS-flogfar við donskum ferðafólkum, sum týsdagin lendi í Warszawa.

Sambært DR lendi flogfarið, SK751, sum ætlað klokkan 9.35. Ferðafólkini sluppu síðan úr flogfarinum.

Flogvøllur stongdur eftir bumbuhóttan

Eitt annað flogfar hjá pólska flogfelagnum LOT, sum kom úr London, varð hótt við bumbu og mátti tí lenda á Modlin-flogvøllinum nærindis Warszawa.

Flogvøllurin varð stongdur, men læt upp aftur um middagsleitið.

Eisini flogfør í Spania, Bulgaria og Ungarn hava verið fyri hóttanum.

Ferðafólk kannað við hundum

Danin Peter Leschly, sum var við SAS-flogfarinum, sigur við DR, at alt gekk friðarliga fyri seg.

Ferðafólkini máttu bíða umleið ein tíma í flogfarinum, áðrenn tey vórðu flutt í bussar, har hundar kannaðu viðførið.

Enn er ógreitt, hvør stendur aftan fyri hóttanirnar, og um tær hava samband hvør við aðra.