Mikukvøldið 3. juni vitjar heimskenda sjónleikarin og modellin Isabella Rossellini Løkshøll, til eitt serligt kvøld um film, náttúru, seyð og lívsleið.

Rossellini er kend fyri leiklutir í filmum sum Blue Velvet, Death Becomes Her og Conclave, umframt sína tíð sum andlit hjá Lancôme. Fyri leiklutin í Conclave varð hon tilnevnd fleiri altjóða virðislønir, millum annað Oscar og BAFTA.

Umframt films- og modellkarrieruna hevur Isabella stóran áhuga fyri náttúru og djórum. Hon rekur saman við dóttrini garðin The MamaFarm á Long Island, har tær arbeiða við vistfrøði, burðardygd og varðveitslu av seyðasløgum. Júst áhugin fyri seyði og ull hevur knýtt hana til Føroyar.

Kvøldið í Løkshøll verður býtt í tveir partar. Fyrst heldur Isabella Rossellini framløgu um sína yrkisleið, familju og samstarv við nøvn sum David Lynch og Richard Avedon. Eftir steðgin fara Heiðrikur á Heygum og Sissal Kristiansen í prát við hana um filmslist, samfelagsábyrgd, føroyskan seyð og arbeiðið á The MamaFarm.

Tiltakið byrjar kl. 20.00 og varir áleið tveir tímar. Prát og framløga verða á enskum, og í steðginum verður boðið te, kaffi og okkurt søtt.

Fyriskipari er The Wool Islands.