Innflytarar og eftirkomarar telja nú 21,7 prosent av øllum fólkinum í Íslandi. Tað er hægsti parturin nakrantíð og merkir, at meira enn fimti hvør íbúgvi hevur innflytarabakgrund.
Sambært Hagstovu Íslands búðu 77.226 innflytarar í landinum 1. januar 2026. Tað svarar til 19,6 prosent av fólkinum. Árið frammanundan var talið 73.795, svarandi til 18,9 prosent. Eisini vaks talið av eftirkomarum eftir innflytarar úr 7.838 upp í 8.351.
Pólendingar framvegis størsti bólkur
Pólendingar eru framvegis nógv størsti innflytarabólkurin í Íslandi. Til samans 23.055 fólk, ella 29,9 prosent av øllum innflytarum, eru fødd í Póllandi. Ukrainar eru næststørsti bólkurin við 6,1 prosentum, meðan litavar eru á triðja plássi við 4,9 prosentum.
Fleiri fáa íslendskan ríkisborgararætt
Í 2025 fingu 1.085 fólk íslendskan ríkisborgararætt. Tað er ein stórur vøkstur samanborið við 638 árið fyri. Flestu nýggju ríkisborgararnir vóru upprunaliga úr Póllandi, meðan filipinar vóru næststørsti bólkurin.
Samtíðis er burðartalið í Íslandi framvegis lágt. Burðartalið í Íslandi var 1,56 barn fyri hvørja kvinnu í 2025, javnt við metlága støðið frá 2024 og tað lægsta, síðani mátingar byrjaðu í 1853.
