Margit Stórá, landsstýriskvinna í almanna- og bústaðamálum, hevur valt tríggjar limir í stýrið fyri Dugna. Jóhanna Jancyardóttir og Heri Reynheim eru nývald, meðan Magni á Deild Olsen er afturvaldur. Tey eru vald fyri tíðarskeiðið 1. september 2026 til 31. august 2030.

Umframt tey trý sita Martin Karl Olsen og Ása Olsen í stýrinum.

Stýrið hevur nú skipað seg av nýggjum við Jóhonnu Jancyardóttir sum forfólki og Martini Karl Olsen sum næstforfólki.

Í gjár vitjaði landsstýriskvinnan Dugna, har hon heilsaði upp á stýrið og ynskti limunum góðan arbeiðshug.

Nýggju limirnir hava báðir drúgvar og viðkomandi royndir við sær í stýrisarbeiðið.

Jóhanna Jancyardóttir er eindarleiðari fyri eindina Børn og ung í Almannaverkinum. Hon er útbúgvin námsfrøðingur og hevur drúgvar royndir innan leiðslu, virknistænastur og sosiala økið.

Heri Reynheim er formaður í Havnar Arbeiðarafelag og hevur drúgvar royndir frá arbeiðsmarknaðinum og fakfelagsarbeiði.

Landsstýriskvinnan takkar samstundis fráfarandi stýrislimunum fyri teirra íkast og arbeiðssemi.