Ein borgari fekk sjúkradagpengarnar roknaðar út eftir einari lægri inntøku enn vanligt, tí arbeiðsplássið hevði verið stongt í tíggju arbeiðsdagar um jólini. Almannaverkið helt fast við, at dagarnir skuldu telja við í útrokningini, hóast borgarin ikki hevði møguleika at arbeiða.
Men Føroya Kærustovnur var ósamdur og hevur nú broytt avgerðina hjá Almannaverkinum.
Avgerðin kann eisini hava týdning fyri onnur tímalønt, sum missa arbeiðstímar, tá arbeiðsgevarin heldur arbeiðsplássinum stongdum.
Tíggju dagar uttan arbeiði gjørdu munin
Málið byrjaði, tá Almannaverkið 3. februar 2026 játtaði borgaranum sjúkradagpengar.
Veitingin varð roknað út frá miðalinntøkuni seinastu fimm kalendaravikurnar undan sjúkrafráveruni.
Men í hesum tíðarskeiði hevði arbeiðsplássið verið stongt í tíggju arbeiðsdagar um jólini. Borgarin hevði tí ikki arbeitt sum vanligt, og inntøkan var lægri.
Almannaverkið helt kortini fast við útrokningina.
Í kæruummælinum skrivaði stovnurin:
– Tað, at arbeiðsplássið var stongt á jólum og har sostatt einki arbeiði var til kæraran er ikki nóg góð grund til at fara longur aftur í tíð á inntøkuváttan.
Starvsfólkið hevði onga ávirkan
Borgarin kærdi avgerðina, tí útrokningin ikki gav eina rættvísa mynd av vanligu inntøkuni.
Kæruumboðið vísti á, at tímalønt starvsfólk ofta ikki sjálv avgera, nær tey fáa frí.
Í frágreiðingini frá fundinum hjá Føroya Kærustovni stendur:
– Hetta metti kæruumboðið vera ein trupulleika, tí at frítíðin hjá tímaløntum ofta verður áløgd av arbeiðsgevaranum, har starvsfólkið sjálvt ikki avgerðarrætt.
Kæruumboðið metti málið vera av prinsipiellum týdningi, tí niðurstøðan kundi fáa avleiðingar fyri nógv tímalønt, sum av ymiskum orsøkum ikki kunnu arbeiða.
Kærustovnurin var ósamdur
Føroya Kærustovnur kom til eina aðra niðurstøðu enn Almannaverkið.
Sambært sjúkradagpeningalógini skulu seinastu fimm arbeiðsvikurnar brúkast sum grundarlag, um inntøkan er lækkað vegna lógligt forfall.
Í viðmerkingunum til lógina verður lógligt forfall lýst sum:
– Frávera grundað á t.d. vanliga frítíð, sjúkt barn, sjúkan familjulim, verkfall ella líknandi, stendur at lesa í viðmerkingunum.
Kærustovnurin metti, at jólafrítíðin hjá borgaranum eisini var lógligt forfall, tí arbeiðsgevarin hevði álagt frítíðina.
Tí skuldi Almannaverkið brúka inntøkuna seinastu fimm arbeiðsvikurnar heldur enn seinastu fimm kalendaravikurnar sum grundarlag fyri veitingini.
Kann fáa týdning fyri onnur tímalønt
Føroya Kærustovnur tók avgerðina 3. september 2026.
Í niðurstøðuni stendur:
– Føroya Kærustovnur hevur avgjørt at broyta avgerðina, soleiðis at seinastu 5 arbeiðsvikurnar undan sjúkrafráveruni skulu nýtast sum útrokningargrundarlag fyri veitingarupphæddini, heldur enn seinastu 5 kalendaravikurnar, stendur at lesa í avgerðini.
Avgerðin kann fáa týdning fyri onnur tímalønt, sum verða noydd at halda frí, tí arbeiðsplássið er stongt.
Í slíkum førum kann vera grundarlag fyri at rokna sjúkradagpengarnar út eftir einum øðrum tíðarskeiði, sum betur endurspeglar vanligu inntøkuna.
Tað verður ikki upplýst í avgerðini, hvussu nógv borgarin fær afturat.
