Ein festari og fleiri fólk á Sandi fáa ikki viðhald í kæruni um umhvørvisgóðkenningina av ætlaðu vindmyllunum í Klivaløkshaga. Tað upplýsir Sands kommuna.

Umhvørvisstovan hevur viðgjørt kæruna og staðfestir, at hon ikki inniheldur nýggjar upplýsingar, sum geva stovninum orsøk til at taka málið uppaftur.

Skuggakastið verður undir markinum

Kæran snúði seg millum annað um skuggakast, avrenning frá vegum og møguliga ávirkan á fuglalívið.

Sambært Umhvørvisstovuni vísa tøkniligar kanningar, at skuggakastið í bygdum øki verður undir tíggju tímar um árið. Tað er markið, sum er ásett í umhvørvisgóðkenningini.

Atkomuvegurin er eisini fluttur. Hann skal leggjast soleiðis, at ávirkanin á vátlendi, gróður og natúrligt frárensl verður so lítil sum gjørligt.

Bíða framvegis eftir svari um friðing

Umhvørvisgóðkenningin fevnir ikki um ávirkan á fuglalívið. Tann spurningurin verður viðgjørdur eftir elveitingarlógini.

Tey, sum kærdu, eru ósamd í niðurstøðuni, men ásanna, at lítið er eftir at gera í hesum máli.

Tey bíða tó framvegis eftir svari um at friða økið við Gróthúsvatn og Søltuvík eftir náttúruverndarlógini.