Heilsuskúli Føroya fer fyri fyrstu ferð at skipa fyri heilsuhjálparaútbúgving við staðseting í Havn.

Nýggja skipanin er ætlað fólki, sum eru 25 ár ella eldri og hava minst trý ára arbeiðsroyndir á eldraøkinum. Eftir førleikameting kunnu tey taka heilsuhjálparaútbúgvingina upp á 25 vikur. Skeiðið byrjar í august 2026.

Meira smidlig heilsurøktaraútbúgving

Samstundis verður heilsurøktaraútbúgvingin broytt til ein meira smidligan leist. Lesandi skulu taka skúlaskeið samstundis, sum tey eru í starvsvenjing. Partar av undirvísingini verða skipaðir sum fjarlestur og partar í Havn og á Heilsuskúlanum í Suðuroy.

Tórshavnar kommuna hevur eisini skipað fyri kunningartiltaki á Boðanesheiminum, har stórur áhugi var millum starvsfólk, sum ynskja at útbúgva seg innan eldraøkið.

Tvær milliónir settar av

Kommunan hevur sett tvær milliónir krónur av á fíggjarætlanini fyri 2026 til útbúgving av heilsustarvsfólki og er til reiðar at gera fleiri útbúgvingarsáttmálar.

Freistin at søkja inn á útbúgvingarnar er fríggjadagin 22. mai 2026.