Eirikur í Jákupsstovu, løgtingsmaður, krevur nú greið svar um, hvussu landsvegir verða raðfestir til umvæling og asfaltering, og hvønn leiklut landsstýrismaðurin hevur í raðfestingini.

Í einum § 52a-fyrispurningi til Jacob Vestergaard, landsstýrismann í vinnumálum, spyr hann millum annað, hvørjir vegir verða umvældir og asfalteraðir av nýggjum í ár, hvussu raðfestingin verður gjørd, og hvørji atlit verða løgd til grund.

Vil hava kostnaðin fram

Løgtingsmaðurin vil eisini vita, hvat tað verður mett at kosta at gera landsvegin millum Klaksvík og Norðoyri.

Hann spyr somuleiðis, hvat tað verður mett at kosta at gera vegin millum tunnilsmunnan og bygdina í Kunoy lidnan, og um ætlanin er at fremja hesa verkætlanina komandi árini.

Fámjin ella Haraldssund

Eirikur í Jákupsstovu spyr eisini beinleiðis, um dagføring av vegnum til Fámjins verður raðfest hægri enn til dømis at gera byrgingina um Haraldssund lidna.

Í viðmerkingunum vísir hann á, at hóast játtanin til asfaltering hjá Landsverki varð hækkað í seinasta samgonguskeiði, røkkur hon framvegis ikki til allar vegir, har tørvur er á asfaltering.

Hann heldur samstundis, at raðfestingin hjá Landsverki ikki hevur verið nóg gjøgnumskygd.