Leó pávi XIV hevur fingið staðfest lungnakrabba. Týsdagin varð 71 ára gamli pávin skurðviðgjørdur á Gemelli-sjúkrahúsinum í Róm, har læknarnir tóku niðara lungalappan í høgra lunga burtur.
Skurðviðgerðin tók 90 minuttir og gekk væl, upplýsir Vatíkanið sambært BBC.
– Skurðviðgerðin eydnaðist, og eingir trupulleikar stungu seg upp. Pávin vaknaði sum vanligt og varð fluttur aftur á sína stovu eftir stutta eygleiðing, sigur Vatíkanið.
Kanna, um krabbin hevur breitt seg
Læknarnir hava staðfest, at pávin hevur adenokarcinom, sum er eitt slag av lungnakrabba.
Sambært fronsku tíðindastovuni AFP verða nú fleiri kanningar gjørdar fyri at staðfesta, um krabbin hevur breitt seg.
Vatíkanið upplýsti mikumorgunin, at pávin hevði havt eina friðarliga nátt á sjúkrahúsinum. Væntandi verður hann innlagdur í umleið eina viku.
Sunnudagin boðaði pávin sjálvur frá, at læknarnir høvdu funnið ein knykil í lunga hansara. Hann segði, at knykilin var væl avmarkaður og funnin tíðliga.
Stórur ótti millum katolikkar
Tíðindini hava skelkað katolikkar kring heimin.
Pietro Parolin kardinalur, ríkisskrivari Vatíkansins, viðgekk týsdagin, at hann var stúrin.
– Ja, eg eri stúrin, tí eg hevði als ikki væntað nakað slíkt, segði hann.
Allar almennar skyldur hjá pávanum eru avlýstar fram til 20. oktober, so hann kann koma fyri seg.
Í november ætlar hann sær til Latínamerika, har hann millum annað skal vitja Peru.
Í býnum Chiclayo, har hann áður var biskupur, biðja fólk nú fyri, at hann skjótt verður frískur aftur.
