Nú hevur Vágs Býráð eisini skipað seg eftir valið í gjár. 

Upprunaliga var endamálið at fáa allar níggju býráðslimirnar við í eitt samstarv, men tað miseydnaðist. 

Tað merkir, at tað verða somu flokkar, Javnaðarflokkurin og Sambandsflokkurin, sum halda fram í samgongu. Javnaðarflokkurin hevur tríggjar býráðslimir og Sambandsflokkurin hevur tveir býráðslimir, so tað røkkur akkurat til ein meiriluta. 

Tjóðveldi við sínum fýra býráðslimum verður so aftur í andstøðu næsta valskeið. 

Samgongan er samd um at tey bæði fyrstu árini skal Levi Mørk verða borgarstjóri og Marin Gaardlykke verður varaborgarstjóri. tey bæði seinastu árini skifta tey um, so Marin Gaardlykke verður borgarstjóri og Levi Mørk verður varaborgarstjóri.