Jacob Vestergaard, landsstýrismaður í vinnumálum, hevur sent eitt lógaruppskot til hoyringar. Uppskotið skal gera tað møguligt hjá føroyingum at fáa atgongd til allar viðkomandi gjaldstænastur, sum eru tøkar í Danmark.

Talan er bæði um danskar loysnir og loysnir úr øðrum ES- og EFTA-londum. Vinnumálaráðið nevnir MobilePay og Vipps sum dømi.

Veitarar fáa lættari atgongd
Sambært Vinnumálaráðnum hava veitarar av gjaldstænastum higartil ikki verið sinnaðir at bjóða loysnir sínar í Føroyum, tí føroyski marknaðurin er lítil.

Við lógarbroytingini kunnu útlendskir veitarar, sum longu virka í Danmark og eru góðkendir í ES ella EFTA, virka í Føroyum uttan serstakar skipanir og loyvi.

Kann lætta um gerandisdagin
– Tað er gleðiligt, at vit skjótt kunnu fáa atgongd til framkomnar gjaldstænastur undir tryggum og skipaðum kørmum, sigur Jacob Vestergaard.

Hann sigur, at tænasturnar kunnu gera gerandisdagin lættari hjá bæði vinnulívinum og føroyingum.